ඒ කොහොම වුනත් දැන් ඔබතුමාව පත්කර ගන්නට ජනතාව තීරණය කරල ඉවරයි. මම නම් ඔබතුමාට ඡන්දය දුන්නෙ නැහැ. වෙනමොනවත් හින්ද නෙමෙයි, මම ඔබතුමාගෙ වචන ගැන විශ්වාස කරන නිසා. ඔබතුමා පත්වූ පසු, රනිල්ට විධායක බලතල සහිතව අගමැතිකම ලබා දීම, චන්ද්‍රිකා එම රජයේ ප්‍රධාන හවුල්කාරියක් වීම වගේ හේතු මත, මම ඔබතුමාට ඡන්දය දුන්නෙ නැහැ. මොකද, ඒ අය හා රාජිත වැනි පිරිස් බලය බෙදීමකට පක්ෂ, සිංහල බෞද්ධ විරෝධීමත දරන, මට කිසිසේත්ම එකඟ විය නොහැකි කණ්ඩායමක් නිසා. එයට අමතරව, චන්ද්‍රිකා යනු මෙරට බිහිවූ දූෂිතම රාජ්‍යය නායිකාව බව අපි සැවොම දන්නා කරුණක්.
ඔය හේතු නිසා මගේ එකම පැතුම ඔබතුමා මහින්දටත් වඩා ලෝක අණ්ඩයෙක් වේවා යන්නයි. එනම්, ඔබතුමා ඉහත සඳහන් අයගෙන් ගත හැකි සියලු ප්‍රයෝජන ගෙන මැතිවරනය ජයග්‍රහණය කර, ඔවුන්ගේ ප්‍රතිපත්තිවලින් පරිබාහිර පාලනයක් කරනු ඇති බවයි.
ඇත්තටම විටෙක මම ඔබතුමාට ඡන්දය දීමට ද සිතුවා. පාඨලී චම්පික රණවක ඇතුළු හෙළ උරුමය වැනි ජාතික බලවේගයක් පිළිබඳව විශ්වාසය තබලා. නමුත් උදය ගම්මන්පිළ ඇතුළු හෙළ උරුමයේ සැළකියයුතු පිරිසකට චම්පික-රතන හිමි කණ්ඩායමේ ක්‍රියාදාමය පිළිබඳව විශ්වාස නොමැති වීමත්, ප්‍රචාරක කටයුතු වල අවසාන භාගයේදී චම්පික, ප.ච. රණවක බවට පත්වීමත් නිසා ඔහු පිළිබඳව කෙසේ නම් විශ්වාසය තබන්නද?
ඇත්තටම රාජපක්ෂ මහතා පරාජය කිරීමේ මේ 'ගේම් එකේ' මෑන් ඔෆ් ද මැච්, ප.ච. රණවකයි. ආණ්ඩුව තුළ සිට මුස්ලිම් ඡන්ද ආණ්ඩුවට අහිමි කළ ඔහු, පසුව රජයෙන් ඉවත්ව ගියේ සිංහල බෞද්ධ ඡන්ද පදනමෙන්ද සැළකිය යුතු ප්‍රමාණයක් රැගෙනයි. රාජිතගේ දුරකථන සංවාද හඬ පටය අනුව මෙය දේශපාලන කුමන්ත්‍රණයක්. රාජිත වැනි ෆෙඩරල් මතධාරියකුට, ෆෙඩරල් මත අමතක කොට හුදු මහින්ද විරෝධයක් වෙනුවෙන් එක්වන ලෙස ඇරයුම් කරන හෙළ උරුමය, තවදුරටත් පවසන්නේ බලය ලබාගත් පසු ෆෙඩරල් මතධාරීන්ට කැමති දෙයක් කළ හැකි බවයි. එයට හෙළ උරුමය වශයෙන් ඔවුන් විරුද්ධ වුවත්, ඔවුන් සතුව ඇත්තේ පාර්ලිමේන්තු ආසන 2ක් පමණක් බැවින් වැඩි බලපෑමක් කිරීමට ඔවුන්ට නොහැකි වන බවද හෙළ උරුමය පවසා තිබේ.
මින් පෙන්වන්නේ කුමක්ද? 2004 තරම් ඈත කාලයේ සිට ආචාර්ය නලින් ද සිලා විසින් ප.ච. රණවක යනු අවස්ථාවාදියකු බව පුන පුනා කියත්දී විශ්වාස නොකළ අප මෝඩයන් වූ බව නොවේද?
කොහොම වුනත් දැන් වෙලා ඉවරයි. රණවක මහත්තයො, අපි දන්නව තමුන්නැහැට තියෙන බලාපොරොත්තුව අනාගත රාජ්‍යය නායකයා වීමයි. ඒකට මාත් බොහොම කැමැත්තෙන් හිටපු කාලයක් තිබුණා. ඒ කොහොම වුනත්, ඔබතුමා මෙතෙක් කල් පොරවගෙන හිටි ජාතිකත්වයේ සළු-පිළි තව ටික කාලයක් හෝ දරාගෙන සිටියි කියල අපි හිතනවා. මොකද මේ නව රජය පිළිබඳව අපට අතිශය සුළු හෝ බලාපොරොත්තුවක් තැබිය හැකි එකම කරුණ එය පමණක් වන නිසා. අපි බලාපොරොත්තුවන ආකාරයට මේ රජය ගමන් නොකළොත් ? එතකොට මට පොඩි කාළකන්නි සතුටකුත් දැනෙනවා, අර අවුරුදු 18-25 මහින්ද විරෝධී තරුණ ඡන්දදායකයන් ගැන. ඔවුන්ට හරි හැටි මතකයක් නැහැ රනිල්-චන්ද්‍රිකා යටතේ වන රජයක ක්‍රියා පිළිවෙළ සම්බන්ධයෙන්. ඔව්, නංගිලා, මල්ලිලා, බලාගන්නකො මොකද වෙන්නෙ කියලා :-D
එතකොට යුධ අපරාධ චෝදනා? සර්බියාවේ 'Milošević' බලයෙන් නෙරපූ වහාම යුද අධිකරනයට ඉදිරිපත් කිරීමට පත්වූ නව රජය (මැතිවරණය ජයගත් ජනාධිපතිවරයා නොදැනුවත්වම, අගමැතිගේ නියෝග මත. එවැන්නක්, මහින්ද සමඟ දැඩි වෛරයෙන් පසුවන චන්ද්‍රිකා නොකරයි යැයි කිවහැකිද?) කටයුතු කළාසේ ක්‍රියාමර්ගයක් ඔබ රජය විසින් ගතහොත්, ඔබේ බිඳ වැටීම්ත් එය වන බව මතක තබා ගන්න. මෙරට 30 වසරක යුද්ඪය අවසන් කිරීමට දායක වූ රණවිරුවන් හා රාජ්‍යය නායකයා යුද අධිකරණයකට ඉදිරිපත් කිරීම වැළැක්වීමට අවශ්‍යය වන්නේ කැරැල්ලක් නම්, ඒ සඳහාද අප සූදානම් බව සිහිතබා ගන්න.
